Святыни

Почаевская икона Божией Матери

Тропарь, глас 5:
Пред святою Твоею иконою, Владычице, молящиися исцелений сподобляются, веры истинныя познание приемлют и агарянская нашествия отражают. Темже и нам, к Тебе припадающим, грехов оставление испроси, помыслы благочестия сердца наша просвети и к Сыну Твоему молитву вознеси о спасении душ наших.

Величание:
Величаем Тя, Пресвятая Дево, и почитаем честную икону Твою, юже от лет древних на горе Почаевстей прославила еси.

Стихира, глас 2:
Непроходимая врата, тайно запечатствованная, Благословенная Богородице Дево, приими моления наша и принеси Твоему Сыну и Богу, да спасет Тобою души наша.

По 50-м псалме стихира, глас 5:
Приидите, российстии собори, и от всех язык, вернии, соберитеся, на гору Почаевскую взыдем и в дом Матере Божия, и узрим место стопы Ея, идеже во огненнем столпе древле явися, и от источника, оттуду истекшаго, верою окропление приимем, и чудотворней иконе Ея поклонимся, прощения прегрешений наших просяще и душам нашим велия милости.